FUTURU NA MAMA SAMIA KATIKA WILAYA YA BUNDA

Posted on: March 30th, 2024

Ni jioni tulivu katika anga za Wilaya ya Bunda ndani ya mwezi Mtukufu wa Ramadhan, Mheshimiwa Mkuu wa Wilaya ya Bunda Dkt. Vicent Anney akiwakusanya wananchi wa Imani tofauti katika Ukumbi wa Heriet kupata futari safi kabisa ikienda kwa jina la Futuru na Mama Samia huku sauti za kaswida zikisikika katika spika za ukumbi huo.

Mgeni rasmi katika futari hiyo ni Mheshimiwa Said Mtanda Mkuu wa Mkoa wa Mara kabla ya kuhamishwa na Mheshimiwa Rais wa Jamhuri ya Muungano wa Tanzania kwenda kuwa Mkuu wa Mkoa wa Mwanza.

Katika futari hiyo, Mheshimiwa Mkuu wa Mkoa alipokua akiongea na wananchi alisema lengo kuu la futari hiyo ni kuwafikia wasiokua na uwezo wa kupata futari, lakini pia kujenga mahusiano mazuri baina ya Viongozi na wananchi, Umoja Upendo na Ushirikiano.

Katika sura nyingine, Mheshimiwa Mtanda aliwaambia wananchi kuendelea kumuombea Mheshimiwa Rais wa Jamhuri ya Muungano wa Tanzania Dkt. Samia Suluhu Hassan katika Uongozi wake, kumpa ushirikiano na kumuunga mkono kwa kazi kubwa anayoifanya ya kuleta Maendeleo Nchini na pia kuendelea kuondoa dhana potofu ya kwamba mwanamke hawezi kuwa Kiongozi.

Awali wakati akimkaribisha Shekh wa Wilaya ya Bunda, Mheshimiwa Mkuu wa Wilaya ya Bunda Dkt. Vicent Anney alimhakikishia Mheshimiwa Mkuu wa Mkoa kwamba hali ya Usalama Bunda ni tulivu licha ya changamoto ndogo ndogo za hapa na pale zote zinaendelea kushughulikiwa na kuwekwa sawa. Aidha Dokta Anney amesema anajifunza mambo mengi sana kutoka kwa Viongozi wa dini pamoja na wananchi kwa ujumla kutokana na kushirikiana nao.

Naye Shekh wa Wilaya ya Bunda Shekh Abuubakar Bin Ally, aliushukuru Uongozi wa Wilaya kwa kuandaa futari hiyo na kuongeza kusema kuwa futari hiyo imetoa funzo kwa Jamii kwamba tuchukuliane kwa kujaliana bila kujali dini, makabila wala itikadi za Vyama na ndivyo vitabu vitakatifu vya dini vinaagiza.