KIKAO CHA VIONGOZI WA DINI NA WATAALAMU WA AFYA WILAYANI BUNDA KUJADILI MAPAMBANO DHIDI YA UVIKO - 19

Posted on: December 31st, 2021

“Viongozi wa dini mnamchango mkubwa sana wa kuelimisha wananchi kuchanja chanjo ya UVIKO – 19, kwasababu katika sehemu za ibada ndio sehemu pekee ambazo wengi tunakimbilia kupata faraja kutoka kwa viongozi wetu wa dini”.

Hayo yamesemwa na Mkurugenzi wa Halmashauri ya Mji wa Bunda Ndg. Emmanuel Mkongo wakati akifunga Kikao cha Viongozi wa dini Wilaya ya Bunda pamoja na Wataalamu wa Afya kutoka Mkoani na Wilayani kwa kushirikiana na Wadau wa AMREF. Kikao hiki kililenga kujadiliana namna ya kudhibiti maambukizi ya Uviko – 19 ikiwa ni pamoa na kufanikisha mpango harakishi na shirikishi kwa jamii na utoaji wa chanjo ya UVIKO – 19.

Mkongo amewaomba viongozi wa dini wakati wakihubiri, kufundisha na kutoa elimu kwa waamini wao, kuhamasisha kupambana na maambukizi ya UVIKO – 19 hasa kuchanja ili kujiweka salama.

Mkurugenzi ameongeza kuwa, Tafiti kutoka kwa wataalamu wa afya zinaonesha kuwa kirusi hiki hakina nguvu kwa watu waliochanja ikilinganishwa na watu wasiochanja ambapo inakua hatari zaidi.

Kwa upande wao viongozi wa dini wamefurahishwa sana na elimu waliyopewa kutoka kwa Wataalamu wa afya na kuazimia kwenda kuelimisha na kuwahamasisha waamini wao kupima na kuchanja chanjo ya UVIKO – 19.