WATUMIENI VIZURI WALIMU TARAJALI WANAOKUJA KATIKA MAFUNZO (FIELD/BTP) - RAS MARA

Posted on: August 2nd, 2023

Jumatano, 02.08.2023

Wakati akiendelea na ziara ya kutembelea shule za Msingi na Sekondari Bunda Mjini, Katibu Tawala wa Mkoa wa Mara Bwana Msalika Robert Makungu alipata wasaa wa kuongea na Waratibu Elimu Kata pamoja na Walimu na kuwashauri kuwatumia vizuri Walimu tarajali wanaokuja katika mafunzo ya kufundisha shuleni.

Katibu Tawala amesema Vyuo Vikuu vimesema viko tayari kuleta walimu wa kutosha kuka kufanya mazoezi ya kufundisha katika Mkoa wa Mara endapo kama maandalizi na mapokezi ya walimu hao yatakua mazuri ikiwa ni pamoja na kuwajali kuwatafutia sehemu ya malazi na chakula pale inapowezekana.

Amesema lengo kuu la kuwatumia vizuri walimu hawa tarajali ni kuhakikisha tunawaandaa vyema watoto wetu kwanza kuweza kujiajiri lakini pia kuweza kuingia kwenye soko la ushindani ndani na nje ya Tanzania. Haya yote yanawezekana kama watoto wataandaliwa vizuri.

Kwa upande mwingine, RAS ameipongeza shule ya Msingi Nyerere kwa kufanikiwa kumudu vyema KKK kwa kuhakikisha watoto wote wanajua Kusoma Kuhesabu na Kuandika, na pia amewataka kuongeza juhudi ili na shule nyingine zipate ushawishi wa kwenda kujifunza katika shule hiyo.

Aidha, Katibu Tawala alipata fursa ya kupanda mti wa matunda katika shule ya Msingi Nyerere ikiwa kama ishara ya kuzikumbusha na kuzitaka shule zote kupanda zaidi miti ya matunda ambayo itakuja kuwa na faida kubwa kwa watoto kutumia matunda hayo. Lakini pia amewakumbusha kutumia njia sahihi ya upandaji wa miti ili kuweza kuiachia nafasi ya kutosha.

#bundayetu

#kaziiendelee